Rheoliadau Diogelu Iechyd (Coronafeirws, Teithio Rhyngwladol) (Cymru) (Diwygio) (Rhif 3) 2021

NODYN ESBONIADOL

(Nid yw’r nodyn hwn yn rhan o’r Rheoliadau)

Mae’r Rheoliadau hyn yn diwygio Rheoliadau Diogelu Iechyd (Coronafeirws, Teithio Rhyngwladol) (Cymru) 2020 (O.S. 2020/574 (Cy. 132)) (y “Rheoliadau Teithio Rhyngwladol”).

Mae’r Rheoliadau Teithio Rhyngwladol yn gosod gofynion ar bersonau sy’n dod i Gymru ar ôl bod dramor. Maent yn cynnwys gofyniad i bersonau sy’n cyrraedd Cymru ynysu am gyfnod a bennir yn unol â’r Rheoliadau hynny.

Mae’r gofynion a osodir gan y Rheoliadau Teithio Rhyngwladol yn ddarostyngedig i eithriadau, ac mae categorïau penodol o berson wedi eu hesemptio rhag gorfod cydymffurfio.

Mae Rhan 2 o’r Rheoliadau hyn yn cyflwyno gofynion profi mandadol mewn cysylltiad â’r coronafeirws ar gyfer pob teithiwr i Gymru o wledydd neu diriogaethau nad ydynt yn esempt. Mae rheoliad 2 yn mewnosod Rhan 2B newydd y mae rheoliad 6B ohoni yn ei gwneud yn ofynnol i bobl sy’n cyrraedd o wledydd a thiriogaethau nad ydynt yn esempt archebu a thalu am brofion sydd i’w cymryd ar ddiwrnod 2 a diwrnod 8 ar ôl cyrraedd Cymru. Mae rheoliad 6C yn ei gwneud yn ofynnol i brofion gael eu cymryd ar ddiwrnod 2 a diwrnod 8 ar ôl cyrraedd Cymru ac os methir â chymryd prawf mae rheoliad 6D yn ei gwneud yn ofynnol i deithwyr ynysu am 14 o ddiwrnodau. Mae rheoliad 6E yn darparu ar gyfer y cyfnod ynysu os ceir canlyniad prawf positif. Mae Rhan 2A yn cyflwyno Atodlen 1B (gwybodaeth archebu) sy’n amlinellu’r wybodaeth archebu y mae’n ofynnol i deithwyr ei rhoi fel rhan o’r darpariaethau trefnu prawf yn rheoliad 6B. Mae Atodlen 1C (profi mandadol ar ôl cyrraedd Cymru) hefyd yn cael ei mewnosod er mwyn gwneud darpariaeth ar gyfer gofynion a safonau technegol y prawf diwrnod 2 a’r prawf diwrnod 8.

Mae Rhan 3 o’r Rheoliadau hyn yn gwneud diwygiadau amrywiol i’r Rheoliadau Teithio Rhyngwladol sy’n gosod mesurau ychwanegol yn ymwneud â chyrraedd o wlad neu diriogaeth a restrir yn Atodlen 3A. Mae rheoliad 12E wedi ei ddiwygio er mwyn gwneud darpariaeth i wahardd personau nad ydynt yn esempt sydd wedi bod mewn gwlad Atodlen 3A o fewn 10 niwrnod o gyrraedd, rhag dod i Gymru.

Mae Rhan 4 o’r Rheoliadau hyn yn gwneud diwygiadau amrywiol i’r Rheoliadau Teithio Rhyngwladol sy’n deillio o’r diwygiadau a wneir gan Rannau 2 a 3 o’r Rheoliadau hyn. Mae rheoliad 14 wedi ei ddiwygio i wneud darpariaeth ar gyfer troseddau o dorri gofynion y Rheoliadau hyn. Mae rheoliad 16 wedi ei ddiwygio i bennu gwerthoedd hysbysiadau cosb benodedig am droseddau o ddarparu gwybodaeth ffug/gamarweiniol mewn perthynas â theithio o wlad neu diriogaeth a restrir yn Atodlen 3, am fethu â bod wedi archebu prawf wrth gyrraedd, am fethu â chymryd prawf mandadol ac am dorri’r gofyniad yn rheoliad 12E. Mae rheoliad 17 o’r Rheoliadau Teithio Rhyngwladol, sy’n ymwneud â defnyddio a datgelu gwybodaeth, wedi ei ddiwygio er mwyn gwneud darpariaeth bellach ynghylch ystyr “Gwybodaeth am Deithiwr o Gymru” mewn perthynas â’r rheini y mae’n ofynnol iddynt ynysu. Mae rheoliad 18 ynghylch ‘hunanargyhuddo’ wedi ei ddiwygio er mwyn darparu ar gyfer troseddau o dan Ddeddf Twyll 2006 a Deddf Twyll a Ffugio 1981 mewn perthynas â darparu’r wybodaeth hon o dan y Rheoliadau Teithio Rhyngwladol.

Mae Rhan 5 o’r Rheoliadau hyn yn diwygio Atodlen 2 (personau esempt) i’r Rheoliadau Teithio Rhyngwladol, sy’n esemptio categorïau penodol o weithiwr rhag gorfod ynysu, neu o dan amgylchiadau penodol, rhag gorfod darparu gwybodaeth am deithiwr. Mae rheoliad 14 yn diwygio Rhan 1 o Atodlen 2 er mwyn mewnosod darpariaeth sy’n esemptio’r rheini sy’n tramwyo drwy’r Deyrnas Unedig rhag y gofyniad i ynysu yn ogystal â rhag y gofyniad i ddarparu gwybodaeth am deithiwr. Mae hefyd yn diwygio Rhan 2 o Atodlen 2 er mwyn hepgor paragraffau 5, 12, 17 i 35, 38 a 39 o Atodlen 2 i’r Rheoliadau Teithio Rhyngwladol.

Mae Rhan 6 o’r Rheoliadau hyn yn creu eithriadau newydd rhag y gofynion i ynysu yn unol â rheoliadau 7 ac 8 o’r Rheoliadau Teithio Rhyngwladol. Mae rheoliad 15 yn mewnosod Atodlen 5 newydd yn y Rheoliadau Teithio Rhyngwladol (eithriadau sectorol). Mae rheoliad 4 yn diwygio rheoliad 10(4) o’r Rheoliadau Teithio Rhyngwladol (gofynion ynysu: eithriadau) mewn dwy ffordd. Yn gyntaf, er mwyn caniatáu i bobl ymadael â’u mangre ynysu at ddiben cael prawf am y coronafeirws. Yn ail, er mwyn darparu y caniateir i’r categorïau o weithwyr a restrir yn yr Atodlen 5 newydd ymadael â’u mangre ynysu er mwyn gwneud eu gwaith pan na fo modd iddynt wneud hynny o’u cartref.

Mae Rhan 7 o’r Rheoliadau hyn yn gwneud diwygiadau canlyniadol amrywiol i’r Rheoliadau Teithio Rhyngwladol mewn perthynas â hepgor gweithwyr Twnnel y Sianel o restr Atodlen 2 o bersonau esempt ac yn gwneud mân newidiadau i Atodlen 5 i’r Rheoliadau hynny.

Mae Rhan 8 o’r Rheoliadau hyn yn diwygio Atodlen 4 i’r Rheoliadau Teithio Rhyngwladol (digwyddiadau chwaraeon penodedig). Mae rheoliad 9 yn rhoi rhestr wedi ei diweddaru yn lle’r rhestr bresennol o ddigwyddiadau chwaraeon.

Mae Rhan 9 o’r Rheoliadau hyn yn gwneud darpariaeth drosiannol mewn perthynas â’r Rheoliadau hyn.

Ystyriwyd Cod Ymarfer Gweinidogion Cymru ar gynnal Asesiadau Effaith Rheoleiddiol mewn perthynas â’r Rheoliadau hyn. O ganlyniad, ni luniwyd asesiad effaith rheoleiddiol o’r costau a’r manteision sy’n debygol o ddeillio o gydymffurfio â’r Rheoliadau hyn.